Burju ni Amanta Debata

Jamita Minggu Letare 10 Maret 2013

HKBP Cibubur Lukas 15:11-32

Hamu angka dongan di bagasan Kristus,

Ia jamita sadari on, i ma sada alus sian Tuhanta Jesus taringot tu ungut-ungut ni angka Parise dohot sibotosurat (ay. 2). Ninna halak i, “Dijangkon On do angka pardosa, pola sapanganan Ibana dohot nasida.” Ala mambege ungutungut ni halak I, gabe dipatorang Tuhanta Jesus ma aha do lapatan ni na sapanganan Ibana dohot angka pardosa, manang angka sijalobeo dohot angka pardosa.

Di na laho patangkashon jamitana, didok Tuhanta Jesus ma tolu umpama. Na parjolo I ma taringot tu parbirubiru na burju, na laho mangalului sada na so tarida. Ndung salpu umpama on, didok Tuhan Jesus do “Suman tusi do gumodang las ni roha di banua ginjang mida sipardosa sahalak, na olo paubahon rohana, asa mida siapulu sia partigor, na so pola paubahon rohanasida.” Lapatan ni umpama on, I ma holong ni roha ni Debata na mangulului sada birubiru na tardempar sian na siapulu sia.

Umpama paduahon, I ma taringot tu sada parompuan na magoan sada hupang. Hupang on, molo tabandinghon dohot hepengta nuaeng, sarupa ma on dohot 8 gr emas. Dung I, di pagalak parompuan I ma palito jala disapui ma bagasna, mangalului tangkas hupang na mago i. Dung salpu umpama on, didok Tuhan Jesus muse, “Suman tusi do masa las ni roha di jolo ni angka surusuruan ni Debata mida sahalak sipardosa na paubahon rohana.”

Dung I, umpama patoluhon. Ra, nunga sude hita mambotosa, manang hea mambege umpama on, taringot tu  “anak yang hilang”, alai sasintongna tokoh utama di bagasan umpama on I ma among na burju i.

Tajaha do di perikop on di parlao ni songon sada anak ni sahalak, sianggian, na mangido sinamotna, asa pintor boi ibana laho tu luat na dao. Di si, dipansuasaehon ibana ma sinamotna I, paolooloi lomo ni roha na. Alai, adong do sada sungkunsungkunhu, boasa dilehon among na I sinamot i? adat ni halak Jahudi, molo marianakhon 2 halak, ingkon dilehon ma 2/3 sian sude artana tu siangkangan, jala 1/3 tu sianggian. Jadi pasti do adong tingki na lewat taringot tu usaha ni sada ama on manggadis angka arta na asa tomu sude 1/3 silehonon tu siampudan on. Molo hubayangkon, ingkon tangis do among na on ala, santabi amang inang, permintaan na kurang ajar sian sianggian on.

Tingki mulak sianggian i, pintor dihaol las diumma bapa na do ibana. Memang songon on do roha ni sada natoras na burju tu ianakhon. Nunga ro di bagasan hataluon sianggian I, alai disambut di bagasan kehangatan di tingki parmulakna tu jabu ni natoras na.

Alai adong do sada sungkunsungkun di rohangku. Toho do ingkon songon I sada natoras maradophon angka ianakhon na songon sianggian on. Aha do siparsiajarhononta sian umpama on?

Adong do 3 poin siparhusorhusoronta di bagasan umpama on.

Parjolo. Alani holong na, diloas Debata do hita mambuat haputusanta sandiri.

On ma burju ni sada ama, Debatanta, marianakhon. Sipata so boi taantusi boasa songon I Debata maradophon hita.

Adong ma sada carita taringot sahalak na mardua ina/selingkuh. Ia baoa on, boi do dohonon sada halak Kristen na gogo marhaporseaon ibana. Alai, di sada tingki, selingkuh ma ibana tu sada parompuan, gabe sega ma rumahtanggana, gabe broken home ma ianakhonna. Mansai asi do roha mamereng keluargana. Alai tingki pajumpang muse, gabe maransit roha ma baoa on tu debata. Ninna, “boasa diloas Debata au pajumpang dohot parompuan i? Molo sala do I, boasa ndang distop Debata ahu?” dipasala ibana do Debata tu hahuranganna sandiri. Molo tapingkir, boi do distop Debata ibana sian selingkuh. Boi do ndang dilehon ama I sinamot ni siampudan i. Alai tong do diloas Debata terjadi hal na songon i? boasa?

Ala ni holong ni Debata tu hita. Sarupa do alasan Debata, taringot tu carita ni si Adam dohot Eva. Autsura pintor dipalao Debata ulok I, ndang saut be dialang si Adam dohot Eva parbue ni hau i. Autsura pintor dipaso Debata si David tingki dibereng ibana si Batsyeba, dang dibuat ibana be si Batsyeba gabe istrina. Autsura ndang diloas ama na I lao sianggian I, ndang adong be carita on.

I do sifat ni Debata.

Huingot do sada film na marjudul Dogma. Pemeran film on I ma si Ben Affleck dohot Matt Damon, na gabe dua surusuruan Debata nasida di film on. Jadi adong ma sada dialog nasida na mansai tangkas huingot sahat tu sadari on. Didok surusuruan on ma, “saya heran melihat kesabaran Allah terhadap manusia. Setiap hari mereka berbuat salah, melawan kehendaknya, tetapi Allah seperti terlalu menyayangi mereka dan tidak menghentikannya. Sementara kita para malaikat yang terus bernyanyi memuji Tuhan harus langsung dihukum begitu kita berbuat salah.”

On ma na nigoaran kehendak bebas, manang free will. Diloas Debata do hita mambuat keputusanta sandiri, nata pe diboto ibana boha do annon ujungna. Molo ndang songon I, tammat ma sude carita on. Ndang be manghatai hita di son, ala holan si Adam dohot Eva ma na mamuji Tuhanta, ala ndang haluar be nasida sian Paradeiso. Ala ni holongna, dilehon Debata do kebebasan tu hita.

Amang inang, yakin do au, adong do nuaeng hamu na gabe natoras ni anak na mago on. Boi do dihilala hamu songon dia hansit ni roha ni Amanta Debata. Mansai hansit do marianakhon na songon on, alai tong do nasida anakta sandiri. Umhansitan do Debata mamereng anakna na hansitan, alai holong do rohana mangalehon kesempatan tu hita asa marsiajar hita sian haputusanta.

Paduahon. Dijalo ibana do jolma na mulak tu ibana.

Tingki dicaritahon Jesus umpama on, nunga diboto halak Jahudi dohot sibotosurat carita na sarupa dohot on. Memang adong do umpama taringot to anak na mago. Alai di carita na asli, asing do ending na. jadi tingki marcarita Jesus, dirimpu halak Jahudi, “huboto do songon dia carita on.” Aha do ujungna? On do. Tingki mulak anakna I, ditulak ama na do ibana. Dipaima ama na ma ibana asa sahat di  bagas nasida, nunga pala dibereng ibana sian na dao, alai marlompit tangan do ibana paimahon. Tingki dipangido anakna asa dijalo muse ibana mulak tu bagas ni amongna, ditulak amongna I do ibana, huhut didok, “lao ma ho, nunga dipillit ho ngolo na songon babi, laho ma ho tu ingananmi!”

Jadi, on do ending ni carita asli na. sarupa do on dohot na tarsurat di 5 Musa 21:18-21. “18 Tung sura adong di manang ise sada anak na so mangoloi ajar jala na tarboan rohana, ndang ditangihon soara ni amana manang inana, diajar nasida pe ibana, laos so ditangihon do nasida. 19 Ingkon tangkupon ni amana dohot inana ma ibana jala toguonna ibana ruar tu adopan ni angka sintua ni hutana i dohot tu pargumbangan ni hutana i. 20 Dung i dohononnasida ma tu angka sintua ni hutana i: Anaknami on ndang mangoloi ajar jala tarboan rohana, ndada ditangihon soaranami, halak pargadombus

dohot parminum do ibana. 21 Jadi ingkon dangguran ni saluhut baoa isi ni hutana i ibana dohot batu, asa mate ibana; ingkon songon i siaphononmu hajahaton i sian tongatongam, asa sandok Israel umbegesa, anggiat mabiar nasida.”

On do carita asli na. sidangguran ni saluhut baoa isi ni hutana I anak na mago on dohot batu.

Alai ndang songon I ending ni carita ni Jesus.

Ra, marsak do roha ni natoras ni sianggian on. Dipingkiri amongna do ibana ganup hari, “didia ma ibana nuaeng? Aha ma ulaonna?” Tingki dibereng ibana sian na dao, pintor ditomu ibana anak na I, marlojong do ibana, dung I dihaol jala diumma ibana anak na i. Molo di bahasa aslina, ndang holan sahali diumma, alai songon las ni roha sahalak ompung mamereng pahompuna, pintor diummai do pahompuna i. Dipaunduk ama on do dirina tingki marlojong ibana mandapothon anak na i. ingkon diangkat ibana do jubahna, hape di budaya Jahudi, ndang boi marlojong sada natua-tua. Ndang tua songon i.

Mansai asing do carita ni Jesus on tu carita di bagasan adat ni halak Jahudi. Didok among na do, “ai naung mate do anakkon gabe mangolu; naung mago ibana, gabe jumping muse.”

Songon on ma holong ni roha ni Debata mamereng hita angka ianakhonna. Tingki tatinggalhon ibana, mansai hansit do rohana. Alai molo olo hita mulak tu bagas ni Debata, mulak muse hita tu angka pangajarionna, pintor marlojong do ibana mandapothon hita.

Sipata hupingkir, patabohu do sianggian on, patut do gabe marsak siangkangan tingki dibege ibana pesta sambutan menyambut parmulak ni anak na mago on. Alai, on do sifat Debata, molo ndang dilului ibana hita (songon carita ni parbirubiru dohot parompuan na magoan hupang), dipersiaphon ibana do pesta molo mulak muse hita tu dalanNa. Dilehon amanai do muse tintin tanda keluarga besar, ala songon sada adat Yahudi do na mamangke tintin lambang keluarga, nunga digadis sianggian on do ra tintinna tingki ndang adong be hepengna. Hot do status ni sianggian on songon sahalak anak, alai hubunganna do na so denggan. Gabe une ma muse hubungan ni sianggian I, ima hubungan anak dohot ama na.

Patoluhon, paima ma asa marsiajar nasida sian hasalahanna.

Ra, adong do di hamu na songon sada natoras na paimahon parmulak ni anak manang pahompu muna na lao, ala perbedaan pendapat, ala arta, keras kepala, hubungan dohot jolma na asing na padaodao hamu dohot angka ianakhonmuna. Molo songon I do hamu, ingot ma songon dia perbedaan carita on dohot dua umpana na parjolo. Di dua carita I, dilului nampunasa do na mago I, I ma birubiru dohot hupang. Alai di carita patoluhon on, dipaima do anak na I asa mulak.

Unang pintor lului hamu angka anak manang pahomu muna, ingkon rajuman nasida do parjolo angka sala nasida. Molo pintor dilului, gabe ndang adong parsiajaran na dilehon tu nasida.

Di dunia pendidikan modern, ala ama sipaima do au, nunga jotjot huhatai hami dohot boru ni rajai songon dia do mangalehon pelajaran tu anak nami haduan. Molo adong kesalahan na, ndang boi talehon pesan ganda. Aha do i? on ma, molo marsala ibana, tong do ingkon hukuman, jala molo dihukum ndang boi adong na mangorai, ingkon kompak do ama dohot ina. Biasana ndang adong masalah di pasangan, dohot ompungna do na maol. Ingkon diajarhon do aha na sala, konsisten, unang pintor diselamathon, ala ingkon marsiajar do nasida. On do na mambahen hansitan roha ni ama dohot inanta mamereng panaritaan ni ianakhonta, alai memang ingkon songon I do. Alai molo diakui ibana hasalahanna, ingkon jatuh ke dalam situasi paling putus asa baru bisa mereka belajar dan menyesalinya, baru di si ma tajalo muse nasida.

Hamu angka dongan di bagasan Kristus,

On ma pesan tu hita sude. Molo dipaima hamu do parmulak ni ianakhon manang pahompu, unang tata rohamuna, tangianghon asa muba. Patudu na rade do hamu manjalo nasida molo mulak muse nasida tu bagasmuna. Hamu angka na lao, unang mabiar hamu mangaku angka kesalahan, mangido maaf muse tu Debata dohot tu natoras/ompung muna.

Sai dipasupasu Debata ma hita mambege joujouna. Amen.

 

Lukas 15 Bahasa Batak Bibel

11 Jala ninna ma muse: Adong ma dua anak ni na sahalak. 12 Gabe didok sianggian i ma mandok amana: Amang, lehon tu ahu sinamot, manang sadia tohaphi! Jala disagihon ma tu nasida panamotan i. 13 Ndang pola piga dan nari, dipapungu sianggian i ma saluhutna, dung i laho ma tu luat na dao; disi ma dipansuasaehon sinamotna paolooloi hisapna. 14 Dung dipasuda saluhutna i, masa ma haleon potir di na saluat i, jadi dohot ma ibana mamungka rapar. 15 Jadi laho ma ibana mahiandu tu sada halak pangisi ni luat i, gabe disuru ma ibana tu ladangna, marmahan angka babina. 16 Disangkapi rohana do manggohi butuhana langkat i, indahan ni babi i; alai ndang adong na mangalehonsa tu ibana. 17 Dung i dipasuang ma rohana tu bagasan, ninna ma: Torop ni halak digaji damang, angka na lobian di indahan; anggo ahu mate ma anturaparon dison! 18 Hehe nama ahu laho mandapothon damang; dohononku ma tu ibana: Ale amang, na mardosa do ahu tu banua ginjang nang dompak ho! 19 Ndang tama be ahu goaron anakmu; bahen ma ahu songon anak gajianmu sada! 20 Jadi hehe ma ibana manopot amana. Alai dao dope ibana, nunga ditatap amana ibana; jadi asi ma roha ni i marnida ibana, hatop ma ditomu, dihaol jala diumma.21 Gabe ninna anak i ma mandok ibana: Amang, na mardosa do ahu tu banua ginjang nang dompak ho; ndang tama be ahu goaron anakmu! 22 Alai ninna ama i ma mandok naposona: Haru, boan hamu ma ulos na dumenggan, salini hamu ma ibana; tintin ma lehon hamu tu tanganna dohot sipatu tu patna! 23 Jala boan hamu ma anak ni lombu na pinamokmok i; potong hamu ma i, naeng mangan hita marlas ni roha. 24 Ai naung mate do anakkon gabe mangolu; naung mago ibana, gabe jumpang muse. Jadi mamungka marlas ni roha ma nasida.

 

Viewed 27681 times by 6889 viewers